Cafe Coffee Day neitu VG Siddhartha thiin chhar

India rama coffee chain lar tak Cafe Coffee Day neitupa VG Siddhartha ruang chu Mangaluru bula Netravati luiah nimin zing dar 4.30 khan chhar a ni.    

VG Siddhartha hi Thawhṭanni zanah khan a awmna chin hriat a ni lo tih amah hmu hnuhnung bertu a driver chuan a sawi a, Thawhlehni khan police-te chuan nasa takin an zawng nghal a ni.

Thawhṭanni zan khan Siddhartha hian a driver chu Hassan bula Sakleshpur kalna leiah a in thlah tir a, hemi hnu aṭang hian hmuh a ni zui ta lo. Luiah a zuangthla nia rin a nih avangin amah zawngtute pawh hian Netravati lui leh a chhehvelah hian beihpui an thlak nghal a ni. 

Nimin zingah khan a ruang hi Ullal bulah tuiin a lenchhuak a, sangha mantu pakhatin a hmu tih PTI chuan an tarlang. Hemi hnu hian a ruang hi  Mangaluru-a Wenlock Hospital panpui nghal a ni a, Chettanahalli estate-ah lak a ni leh bawk.

A chhungte chuan a ruang hmuh a nih hnu lawkah hian amah ngei a ni tih an puang nghal a ni.

A bo hma lawk hian Siddhartha hian Bengaluru-a Cafe Coffee Day head office-a a personal staff chu biain, lehkha thawn thehdarh tur chungchang a hrilh.

He lehkhathawnah hian a pawisa batna aṭang leh Income Tax official aṭanga nawrna leh vauna a tawh chungchang a inziak a, amah ringtute a tihhlawhchham avanga pawi a tih thu a ziak bawk.

Lehkha thawn hi July 27-a ziah anga chhinchhiah a ni.

India coffee chain lian ber Cafe Coffee Day hi  kum 1993 khan VG Siddhartha hian bul a ṭan a, Coffee Day Global nena inthlunzawm niin India ram state 28-ah outlet 1,843 an nei mek a ni. VG Siddhartha thih thu puan a nih hnu lawkah hian Coffee Day Enterprises Ltd chuan independent director SV Ranganath chu chairman lailawk atan ruat a nih thu an puang nghal.