Bharatiya Kisan Sangh-in 'chakka jam' thlawp dawn lo
Rashtriya Swayamsevak Sangh (RSS) hnuaia loneitu pawl, Bharatiya Kisan Sangh chuan farm law thar duh loha nawrh huaihawt mek, loneitu pawl hrang hrangten vawiina ram pum huapa kawngpui dan an tumna, 'chakka jam' huaihawt an tum chu an thlawp ve dawn lo tih an sawi.
RSS hnuaia pawl hian farm law siam thar pathumte erawh siamṭhat an duh thu an sawi a ni. Nawrh huaihawt mek, loneitu pawl hrang hrangte chuan dan siam thar pathum, Farmers' Produce Trade and Commerce (Promotion and Facilitation) Act, 2020, Farmers (Empowerment and Protection) Agreement on Price Assurance and Farm Services Act, 2020, leh Essential Commodities (Amendment) Act, 2020 duh lohna lantir hian ram puma nawrh huaihawt an lo tum a, mahse hei hi thlak lehin darkar thum chhung national leh state highway-te dan an tum leh zawk a ni.
Ram chhung hmung hrang hrangah loneitute nawrh huaihawt mek hian thlawp a hlawh hle a, hetihlai hian loneitu pawl zinga pakhat Bharatiya Kisan Sangh hian vawiina nawrh huaihawt turah an tel ve dawn loh thu hi an sawi thung. BKS organisation secretary for Madhya Pradesh and Chhattisgarh, Mahesh Choudhari chuan, "Bharat Bandh hi kan thlawp dawn lo a, mahse hemi avang hian dan siam thar pathumte hi a zavaiin kan thlawp tihna a ni lo," a ti.
Loneitute nawrh huaihawt meka hma la tu ber, Bharatiya Kisan Union hotu Rakesh Tikait chuan farm law siam tharte hi a sut leh thuai a nih loh chuan, sorkar laipui chuan a thuneihna chu a chan thuai dawn a ni, a ti. Farm law pathumte chu sut a,minimum support price (MSP) system kalpui chhunzawmna tur a thar duang turin sorkar chu a ngen.