Delhi Police-ten eptu MP 15-te dang

Eptu party 10 aṭangin MP 15-te chuan nimin khan loneitute nawrh huaihawt mekte awmna, Ghazipur border tlawh an tum a, mahse Delhi Police-ten an dang. 

Eptu MP-te hian bus-in Ghazipur border hi an pan a, mahse police-te chuan  daidanna an siamte an kaltlang an phalsak lo niin a sawi a, hei vang hian loneitute hi an va pawh thei ta lo tih  SAD MP Harsimrat Kaur Badal chuan a sawi. 

Nawrh huaihawta hun rei tak loneitute  inkhuar tawhna, Delhi-Uttar Pradesh border, Ghazipur-ah hian venhimna khauh taka kalpui a ni a,loneitute awmna tlawhpawh theih loh turin police-te chuan daidanna an siam a, barbed wire bakah cement hmangin daidanna an siam. 

Badal chuan Ghazipur border-a loneitute dinhmun leh enkawl an nih dan chuan a rilru a khawih hle tih sawiin, concrete bang leh barbed wire hmangin dan beh a ni a, ambulance leh fire brigade-te pawhin an nawrh huaihawtna hmunah hian an lut thei lo niin a sawi. Parliament-ah loneitute dinhmun tawn mek an sawi theihna atana tlawh tum an nih thu a sawi.