JD(U)-in inbiakna nei leh turin ngen

National Democratic Alliance (NDA) hnuaia BJP thawhpui, JD(U) chuan farm law thar pathumte a thlawpna lantirin, party national president RCP Singh chuan heng farm law-te  loneitute tana ṭha lo pumhlum, 'anti-farmer' an ni lo tih a sawi. 

Singh chuan sorkar laipui dan siam tharte hi loneitu hma ngaia siam a ni tih sawiin, mahse loneituten siamṭhat leh ennawn ngai a awm nia an  hriat chuan sorkar chu inbiakna an neihpui mai zawk tur a ni, a ti. Supreme Court thupek angin sorkar laipui pawhin inbiakna neihpui leh turin a sawm reng a ni, tiin a sawi. Loneitute chu sorkar nena inbiakna nei leh tura ngenin, an eizawnna hlawk zawk leh sum tam zawk an lakluh theih dan turte sawiho a ngai a ni, a ti. 

Nawrh huaihawt a nih hnuah loneitu leh sorkar laipui aiawhte hi ṭum 11 an inbe tawh a, mahse inremna an la siam thei lo a ni. Loneitu lam hian dan siam thar pathumte hi sut vek an phut a, mahse sorkar lam chuan hei hi a remti lo a, sut kher loin a ṭul anga siamṭhat a inhuam thu a sawi thung.