SC-in Unnao rape case Delhi-a ngaihtuah turin a sawn
Supreme Court chuan Unnao rape case kaihhnawih thubuai panga chu Delhi-a special court ngaihtuah turin nimin khan a sawn.
Court chuan Uttar Pradesh Unnao-a pawngsual tawktu chuanna motor, Pathiannia truck-in a sut avanga hliam na tak tuar mek hnenah zángnadawmna cheng nuai 25 pe turin a hriattir bawk.
Chief justice Ranjan Gogoi kaihhruai Supreme Court bench chuan thubuai hi Delhi-a ngaihtuah tura a sawn bakah, ni 45 chhungin he thubuai hi chingfel hman turin a ti. CJI Gogoi chuan, "UP sorkar hnenah pawngsual tawktu hnenah hian zángnadawmna cheng nuai 25 pe turin kan ti a ni. Amah leh a ukil, a nu leh a unau pali te, a pu leh Unnao khuaa an chhungkaw member dangte pawh venhimna pe turin kan ti bawk," a ti. UP sorkar chuan pawngsual tawktu venhim hna thawk tura a lo ruat tawh, police pathum chu a suspend tawh bawk a ni.
Thubuai hi Uttar Pradesh sorkar rawt angin Thawhlehni khan CBI-in kuta hlan a ni.
Pawngsualtu-a puh BJP in hnawtchhuak
Kum 2017-a Unnao-a hmeichhe kum tling lo pawngsualtua puh BJP MLA Kuldeep Sengar chu nimin khan BJP aṭangin hnawhchhuah a ni. Sengar hi CBI chuan Unnao-a pawngsual tawktu hmeichhe chuanna motor beihnaah hian inhnamhnawiha puhin tualthah thubuai a siamsak tawh a, ani bakah hian midang pakua pawh thubuai siamsak an ni bawk.
Unnao-a pawngsual tawktu hian car accident thlen hma karhnihah khan, chief justice Gogoi hnenah amah leh a chhungte chuan vau an tawk fo tih sawiin, hma laksak turin a ngen. Mahse a lehkha thawn hian CJI hnen hi a thleng lo a, hei vang hian CJI pawh a lawm lo hle. Gogoi chuan hemi chungchang hi ngaihtuah a ni dawn a, lehkhathawn tihkhawtlai a nih chungchanga registrar report pawh enfiah a ni dawn tih a sawi.