Lok Sabha-ah paper hmang tawh dawn lo

Lok Sabha speaker Om Birla chuan session leh aṭangin sum sen a tlem phah zawk nan, paper an hman tawh dawn loh thu nimin khan a sawi.

House member-te chu hardcopy leh e-copy-ah an duh zawk thlang tura zawh an ni dawn a, paper hman pawh tihtlem chhoh telh telh tum a ni ang. Document pawimawhte pawh online-a en theih turin dah vek a ni ang. 

Zero Hour neih laiin Om Birla chuan e-copy hmang tam turin house member-te a fuih. Parliament chu paper hman lohna hmuna siam an duh thu sawiin, hemi atan hian session neih leh hma thla hnih leh a chanve chhugin atan an lo inbuatsaih thei tih a sawi. 

Birla chuan, "MP-te chuan personal assistant neiin, infor­mation pawimawhte chu online-ah an en thei vek ang," a ti. Paper hman loh tum chhan hi kum tina thingkung kih ṭhin tihtlem a nih theih nan leh paper print atana sum tam tak sen ṭhin tihziaawm theih nan a ni.