Ayodhya chungchanga inbiakna hlawhchham August 6 aṭangin hearing nei dawn
Ayodhya ram inchuh buaina chungchanga member pathum awmna panel-in inremna kawng zawnga a hmalakna chu a hlawhchham. August 6 aṭangin Ayodhya case hi hearing neih ṭan a ni ang.
Ayodhya case hi chief justice of India Ranjan Gogoi kaihhruai, judge panga awmna bench in a ngaihtuah dawn. Bench member dangte chu SA Bobde, DY Chandrachud, Ashok Bhushan leh S Abdul Nazeer-te an ni. CJI Gogoi chuan he case hi hearing neih ṭan a nih aṭanga ni 100, November 17-ah thutlukna siam tum a ni.
Supreme Court chuan he thubuai kaihhnawiha inlan turte chu inbuatsaih lawk a, finfiahnate pawh nei turin a ti a, hearing neih hmain an thil neih copy-te chu Registry-ah lo pe lawk turin a ti. Ayodhya buaina chinfel dan ngaihtuah a, inbiakna neihpui turin March 8 khan Supreme Court chuan SC judge hlui FM Kalifulla kaihhruai, member pathum awmna panel a din. Member atan hian spiritual guru Sri Sri Ravi Shankar leh senior advocate Sriram Panchu-te dah an ni. Anni hian stakeholder hrang hrangte biain, inremna siampui dan kawng an zawnpui a, Ningani khan Supreme Court-ah report an thehlut.
Kum 2010 khan Allahabad High Court-a Ayodhya ram inchuh thubuai chinfelna turin ram acre 2.77-a zau chu Sunni Waqf Board, Nirmohi Akhar leh Ram Lalla-ten inang tlanga insem turin a lo relsak tawh. Mahse court thupeka lungawi loin Supreme Court-ah hian appeal 14 zet a lut a ni.