Pakistan firfiakten Amarnath Yatra beih an tum: Army

Indian Army-a Lt General K J S Dhillon chuan nimin khan press conference-ah ni thum ni li liam ta chhung velah khan Pakistan firfiakten Amarnath Yatra beih an tum tih report an dawn thu a sawi.

Nimin khan Lt General K J S Dhillon, Jammu and Kashmir DGP Dilbag Singh leh IG CRPF Zulfiqar Hasan-te chuan joint press conference koin hetah hian Dhillon chuan hemi chungchang hi a sawi chhuak. Army chuan Pakistan leh a sipaite chu Kashmir-a firfiaka chetnaah hian an inhnamhnawih tih rin chhan an nei tih leh Kashmir Valley-a muanna tihchhiat an tum thu a sawi.

Dhillon chuan firfiakte an zawnnah hian ralthuam, silaimu leh puak thei thil an hmu hnem hle tih leh, an hruaitu lu eng emaw zat chu an that tawh tih a sawi. Army chuan an hna an la thawh chhunzawm zel a, Kashmir Valley-a boruak muanawm tihchhiat chu an phal ngai dawn lo a ni, a ti.

Army, CRPF leh Jammu and Kashmir Police ṭangkawpte chuan ni eng emaw zat chhung chu firfiakte dapchhuah beihpui hi an thlak tawh a ni.