Farm law tharah dik lo engmah a awm lo Nawrh huaihawtnaah dik lo a awm zawk : Union Minister

Union agriculture minister Narendra Singh Tomar chuan nimina Rajya Sabha-a farm law thar chungchang sawihonaah, farm law siam tharah hian dik lo engmah a awm lo a,  loneituten duh lohna lantira nawrh an huaihawtnaah thil dik lo a awm zawk a ni, a ti. 

Minister chuan farm law duh lohna lantira nawrh huaihawt mek, loneitute chu fuihtu an awm nia sawiin nawrh huaihawt pawh hi state pakhatah chauh neih a ni, a ti. Loneitu pawl hrang hrang leh anmahni thlawptu eptu party-te chuan dan siam thar pathuma thil dik tawk lo awm engmah lakchhuah tur an hre chuang lo niin a sawi bawk. 

Sorkar laipui chuan loneitute chu zah tak leh ṭha taka a dawnsawn thu sawiin, inremna siampui tumin ṭum eng emaw zat inbiakna pawh a neihpui tawh a ni a ti a, dan tharte pawh a ṭul a nih chuan siamṭha turin a inhawng reng a ni, tiin Tomar chuan a sawi. Hemi rual hian  dan tharte siamṭha tura sorkar a inhawn avang hian dik lo a awm tihna a ni lo, a ti. 

"Loneitute hnuai­chhiah lam hawiin eng ṭawngkam mah kan chhakchhuak lo," tiin Tomar chuan sorkar leh a thlawptute loneitu nawrh huaihawt mekte a hnuaichhiah hle nia puhna chu a chhang bawk. Hetih lai hian loneitute chu thu dik tawk lo hrilhin, farm law tharte hman an nih chuan an ramte chu chhuhsak an ni dawn nia lo hrilh an awm a ni, tiin minister chuan a sawi. Mahse an dan siam tharah hian sumdawng tumahin loneitute ram an neihsak phalna tur engmah dah a ni lo tih a sawi. 

Minister chuan Lo­neituten an buaipui ber, Minimum Support Price (MSP) chungchangah pawh production cost aia 50% a tama siam a ni, a ti. Sorkar chuan loneitute ṭhatna tur chauh a ngaihtuah a ni, tiin prime minister Narendra Modi kaihruai chuan loneitute sum lakluh a leta tihpun a nih theihna turin theihtawp a chhuah mek a ni, a ti. 

Lok Sabha inkhawm chu eptuten farm law chungchanga  a hrana sawiho an phut chhunzawm zel avangin ni thum chhung ro rel thei loin an awm tawh. Hetih lai hian eptu party zinga ṭhenkhat chuan Rajya Sabha kalphung ang zawm mai ṭha ti pawl an awm. 

Rajya Sabha-ah chuan eptuten farm law chungchang sawihoa rorel inkhawm an tihbuai hnuah Thawhlehni khan sorkar lam nen inremna an siam a ni. Eptute hian President lawmthu sawina  chungchang sawihona tura hun ruat chu dah belh a, loneitute harsatna tawh mek sawihona siam an rawt a, hei hi sorkar chuan an remtihpui a ni. Debate atana darkar 10 hun ruat chu, darkar 15-ah tihpun a ni a, Nilaini aṭang khan he hun hi an hmang ṭan.