Greta Thunberg tweet vangin FIR ziak lut

Swedish climate activist Greta Thunberg-in farm law thar duh lohna lantira loneitu nawrh huaihawt mekte thlawpna thu a tweet chungchangah Delhi police-te chuan FIR an ziaklut. 

Ningani khan FIR hi ziaklutin, sorkar laka hel tura fuih, ram pawn lam aṭanga phiarrukna leh mipui inkara inhuatna thlen tir tuma puhna te a tel. Police-te chuan an thubuai ziahluhah hian Greta Thunberg hi a hming hmerhin an tarlang lo a, a thu post, loneitute thlawpna thu, powerpoint toolkit siamtu lakah thubuai hi an thehlut niin an sawi. 

Loneitute thlawpna thu a post avangin kum 18 mi, Thunberg hian sawisel leh vau pawh a tawk zui nasa a, mahse eng anga vauna pawh tawk mah se loneitute a thlawpna chu a danglam phah dawn lo tih a sawi zui. Thunberg hian Nilaini khan loneitute thlawpna a post a, hei hi delete  in a tuk Ningani-ah 'toolkit' a rawn share a, hetah hian nawrh huaihawt mekte thlawp leh puih dan tur kawng sarih a tarlang. February 13 leh 14-ah an awmna aṭanga hnai ber Indian embassy bulah ṭheuh loneitute thlawpna lantira nawrh huaihawt a rawt bawk.