EC-in BJP star campaigner pahnih list aṭanga paih turin hriattir
Election Commission of India (ECI) chuan nimin khan Bharatiya Janata Party (BJP) hnenah an party hruaitu pahnih, Anurag Thakur leh Parvesh Verma-te chu Delhi legislative assembly neih tura an party star campaigner list aṭanga paih turin a hriattir.
BJP hruaitu pahnihte hian buaina chawk chhuak thei zawnga thu an sawi avangin ECI chuan star campaigner zingah telh a khapsak a ni. Star campaigner-te hi an campaign-na senso tur party-in tumsakin, an sum hman theih zat pawh bithliah a awm lo. Thakur leh Verma-te hi inthlan neih tur atan hian an la campaign chhunzawm thei dawn tho a, mahse star campaigner list-ah an tel tawh loh chuan an campaign-na senso hi candidate-te sum hmanah telh a ni tawh dawn thung a, candidate-te hi campaign-na atana an sum hman theih zat bithliah sak an ni. State assembly inthlana candidate-te sum hman theih chin hi cheng nuai 28-ah bithliah a ni.
Union minister, Anurag Thakur hian a campaign-naah 'ram phatsantute chu kaphlum mai rawh u' tiin a sawi a, BJP West Delhi MP Parvesh Verma hian CAA duh lohna lantira Shaheen Bagh-a nawrh huaihawtte chuan nakinah mi inah luhkhungin an farnu leh fanute an la pawngsual sak ang, tiin a sawi bawk. ECI chuan a thusawi chungchangah Verma hi hriattirna pe bawkin, vawiin chhun thleng insawifiah turin hun a pe.
Seat 70 awmna, Delhi Legislative assembly inthlan hi February 8 hian neih a ni ang. Kum 2015 inthlanah khan rorellai, Aam Aadmi Party (AAP) hian seat 70 zinga seat 67-ah hnehna a chang a ni.