Home minister-in intelligence hotute a kawm

Union home minister Amit Shah chuan nimin khan Jammu and Kashmir-ah firfiakten pawikhawihna thlen leh an tum tih intelligence report a awm vangin national security advisor Ajit Doval, intelligence bureau chief Arvind Kumar, RAW's Samant Goel, union home secretary Rajiv Gauba leh official dangte chu venhimna kalpui dan a sawipui.  

Kumin February thlaa Pulwama-a CRPF convoy beihna ang kha firfiakten thlen tir an tum leh niin intelligence report a awm. Hei vang hian Jammu and Kashmir-ah hian sipai eng emaw zat dahbelh an ni a, state chhunga Amarnath Yatra hmanga kalte pawh inthiarfihlim thuai tura hriattir an ni tawh a ni. 

Intelligence report chuan July 29 leh July 31 inkar khan firfiakte chuan Line of Control paltlang a, India rama luh tumin ṭum eng emaw zat an bei tih a sawi. Army chuan Inrinni khan India rama rawn luh ruk a, Keran sector-a army post beih tum, Pakistan Border Action Team member panga an kaphlum tih an sawi. Pakistan hnenah heng mite ruang hi la nghal turin hriattir ni mah se, tun thlengin an la rawn chhang lo. Keran sector-ah hian ramri-ah nimin zing thleng khan an inkap nia sawi a ni bawk. 

Kar kal ta chhung khan sorkar laipui chuan J&K-ah sipai 35,000 zet a dahbelh a ni. Zirtawpni khan thuchhuah siamin, J&K-a Amarnath Yatra hmanga kalte pawh an theih anga ranga kir turin a hriattir tawh bawk a ni. Home minister Amit Shah chuan Parliament budget session tawp veleh ni thum chamin J&K hi tlawh a tum.

J&K dinhmun a him tawk lo nia sawi a nih avangin, Israel pawhin nimin khan thuchhuah siamin Israel mi awmte chu he state hi chhuahsan thuai turin a ti. United Kingdom, Germany leh Australia pawhin an mi leh sate chu Jammu and Kashmir-a zin rih lo turin an chah bawk.