Doctor-ten an nawrh titawp Vawiin aṭangin duty chhunzawm dawn

National Medical Commission (NMC) Bill duh loh vanga nawrh huaihawt doctor-te chuan nimin khan union health minister Harsh Vardhan meeting an neihpui hnuah nawrh huaihawt chu an titawp tih an puang. Doctor-te hian vawiin aṭangin an duty an chhunzawm leh ang.

AIIMS, New Delhi-a residential doctor-te hi nimin khan Union Health Minister hian meeting neihpui turin a ko a, meeting an neih zawh hnu hian ni li zet nawrh an huaihawt chu an titawp dawn tih an puang a ni.

Harsh Vardhan chuan meeting an neih zawh hnu hian AIIMS RDA-te nen a chenna inah meeting an neih thu sawiin, National Medical Commission Bill chu medical education field-a health service ṭha zawk mi vaibelchhe 130-in an neih theihna tur a ni tih a sawinawn leh.

NMC Bill hi kar liam ta khan Parliament-ah pawm a ni a, hemi hnu hian doctor-te hian an duh lohna lantirin nawrh hi an huaihawt nghal a, Inrinni khan Union Ministry for Health and Family Welfare chuan an hna an zawm vat loh chuan banah a lo vau hial tawh.

NMC Bill hi Medical Council of India aiawh tur a ni a, common MBBS final year examination - National Exit Test (NEXT) tih buatsaih a, chu chu post-graduate medical course admission atan leh medicine practice-na tur license neihna atan hman zui a rawt bawk.

He bill hi doctor-te chuan an dodal nasa hle a, medical education leh healthcare service tihchhiatnaah an ngai. Bill-a section ṭhenkhat chuan MBBS degree nei lote modern medicine practice-na tur kawng a hawnsak tih an sawi 

thung a ni.