AP-in February 1 aṭangin Home deliver pension hmang dawn

Andhra Pradesh (AP) sorkar chuan February 1 aṭangin an state chhunga pensioner mi nuai 54.64-te tan home deliver pen­sion a hmang ṭan dawn. 

Pension card thar leh rice card-te chu February 15- 21 chhunga sem chhuah tura ruahmanna kal­pui a nih thu chief minis­ter YS Jagan Mohan Reddy chuan a sawi. Thawhlehni khan CM, Chief Secretary Neelam Sawhney, Director Gene­ral of Police (DGP) D Gau­tam Sawang leh offi­cial dangten mipuite tana buatsaih 'Spandana' plat­form thlir letna an nei an ni. 

Andhra Pradesh-in inthlanna a hmachhawn hma thla ruk liam ta khan pensioner hi mi nuai 39 an awm a, tunah chuan mi nuai 54.64-ah a pun belh a ni. Pension leh white card chungchanga card nei thei chin tur fel taka bithliahna chu collector-te'n thingtlang khuaa secretariat-ah an tarchhuak dawn bawk. State sorkarin pensioner-te hnena card a pek chhuah tur hi service hrang hrang 541-ah a ni dawn a, rice card atana dilna thehluttu chuan a dil aṭanga ni 5 chhungin secretariat aṭangin card a dawng thei nghal bawk ang. 

CM Jagan chuan Feb­ruary 28-ah Vidya Vasathi Deevena scheme kalpui a nih tur thu sawiin, he scheme hnuaiah hian sorkar school-a zirlai naupangte ṭanpui nan state sorkar chuan zirlai naupang nu te bank account-ah pawisa a thun sak dawn a, installment hi vawi hnih a pek tum a ni a, July leh December thlaa pek tum a ni.