Uttarakhand-ah vur tlang darhin tuilian siam Chin hriat lohin mi tam tak an la awm

Uttarakhand-a Cha­moli district-ah nimin zing khan  vur tlang lian darhin vur tawlh nasa tak a siam a, Alaknanda leh Dhauliganga lui tui a len phah a, a chhehvela awmte chu hmun him lamah sawnchhuah nghal an ni. 

Uttarkhand chief secretary Om Prakash chuan tuilian vang hian mi 100-150 vel an thi niin a sawi a, mi tam tak chu tui lenna bul velah hian an la tangkang nia hriat a ni bawk. Chhiatna thlenna hmunah hian chhan­chhuah hna thawk turin National Disaster Response Force (NRDF) team panga leh ITBP (Indo-Tibetan Border Police) team pahnih tirh nghal an ni. NDRF Director-General SN Pradhan chuan Delhi bula Hindon IAF base aṭangin team dang pali vel tirh belh tum a nih thu a sawi bawk. SDRF (State Disaster Response Force) mi leh sa 200 vel chu chhanchhuah hna thawk tur hian tirh an ni tawh bawk a ni. 

Tuilian hian chenna in eng emaw zat leh Rishinganga power project thawhna hmun a tichhia a, he project hnuaia thawk mek mi 150 chuang chu an chin hriat lohin an awm. Prime minister Narendra Modi chuan Uttarakhand chief minister Trivendra Singh Rawat leh state official dangte be nghalin, thil thlen dante an sawiho. Union home minister Amit Shah pawhin CM Rawat hi a biak thu a sawi. 

CM Rawat chuan a kaihhruai sorkar chuan chhiatna tawkte chhanchhuak turin theihtawp a chhuah mek tih a sawi a, chhiatna thleng chungchangah midangte tichiai zawnga thu dik tawk lo thehdarh lo turin mipuite a chah nghal a, nimin khan chhiatna thlenna hmun hi a pan nghal a ni.