Vaccine pek hna chak zawka kalpui turin ti

Sorkar laipui chuan state leh Union Territory hrang hrangte hnenah Covid-19 vaccine pek hna kalpui mek chu chak zawka kalpui turin a hrilh. 

January 16 aṭang khan ram pum huapin vaccine pek hna hi kalpui ṭan a ni a, healthcare leh frontline worker nuai 57 chuang hnenah pek a ni tawh. India aia vaccine pek chhuak hnem tawh chu US leh UK chauh an la ni. 

Vaccine la tawh zingah hian healthcare worker 53,04,546 leh frontline worker  4,70,776 an awm. Vaccine la hnem tawh ber chu Uttar Pradesh niin, 6,73,542 hnenah pek a ni tawh a, Maharashtra-ah mi 4,73,480 leh Rajasthan-ah mi 4,59,652 pek an ni tawh bawk. State 12-te chuan mi nuai hnih chuang ṭheuh hnenah an pe tawh bawk. 

Hetih lai hian sorkar chuan state leh UT-tinte chu chak zawka vaccine pek hna hi kalpui zel turin a chah a, February 20 hma ngaia healthcare worker-te pe kim hman vek tura ruahman turin a ti. Hei bakah hian March 6 hmaa frontline worker-te vaccine pek kim hman tum turin a ti bawk a ni. March thla chhung hian vaccine pek thawh hnihna, kum 50 chung lamte hnena pek tur chu kalpui ṭan a ni ang. 

January pek chhuah ṭanni, January 16-a dawngte tan a dose hnihna chu February 13 aṭangin pek ṭan leh an ni ang. 

Union health minister Harsh Vardhan chuan ram chhunga Covid-19 vaccine pek mek pahnih, Covishield leh Covaxin ni lo, coronavirus vaccine dang pasarih siam mek a nih thu a sawi. 

Minister chuan India-in vaccine a hman mek pahnihte chu open market-a zawrhchhuah phalsak turin sorkar laipui chuan ruahmanna a la siam lo tih a sawi a, boruak awmdan a zirin  ngaihtuah a la ni chauh ang, a ti. 

Ram chhunga Covid-19 vaccine dang siam mek zinga pathum chu trial phase ni tawhin, pahnih chu pre-clinical stage an la ni a, pakhat chu phase 1-ah la awmin, a dang pakhat chu phase 2 a la nih mek tih union minister chuan a sawi bawk. 

India rama siam, Covid-19 vaccine-te chu ram 15-ah supply an ni tawh a, ram dang 25-in an lo la  nghak mek bawk tih external affairs minister S Jaishankar chuan a sawi. 

Vaccine an pekna ram ṭhenkhat chu ram rethei zawkte an nih avangin grant basis-a pek an ni a, ram dang ṭhenkhat erawh chuan India sorkarin a leina ang zat thoa leitir an duh niin minister chuan a sawi. Ram ṭhenkhat chuan vaccine siamtu company-te nen direct contract an neih avangin a man zat tur chungchang pawh an sawi dun mai a ni, a ti.