Article 370 ṭhiah duh lohna kawngzawhah police pathum hliam Article 370 ṭhiah vangin Ladakh MP lawm

Jammu and Kashmir-a Poonch district-ah Thawhlehni tlai tawh takah khan Article 370 ṭhiah duh lohna kawngzawh neih a ni a, he kawngzawhnaah hian police pathumin hliam an tuar.

Kawngzawh zinga ṭhenkhat hian police duty-te chu lunga vawmin police pathum hian hliam hi an tuar ta a ni. Hliam tuar zingah hian officer pakhat a tel. Officer hliam tuar hi Deputy superintendent of police (operations) a nih thu tarlan a ni a, lunga an vawmna hmun hi Bafliaz-ah a ni tih tarlan a ni bawk.

Police-te hian kawngzawhte hi tiang nen hnawhdarh an tum a, kawngzawhte hian lungin an lo vawm let a ni. Hliam tuarte hi damdawi-in panpui nghal an ni.

Ladakh  BJP MP Jamyang Tsering Namgya chuan Article 370 ṭhiah a ni chu lawmawm a tih thu sawiin, Congress party chuan Ladakh chu 'education refugee'-ah a siam niin a puh. 

Jamyang Tsering Namgya chuan Congress chu nuhrawn ang mai an nih thu a sawi bawk. Lehkha zir turin khawpui dangah an insawn a ngai a, Kashmir hnuaia a awm avangin Ladakh chuan  hma a sawn thei lo tih a sawi bawk.

Jammu and Kashmir hi an dinhmun diktak hriat a harsa hle a, ramchhung media-te thu thehdarh zawng zawng hi a rintlak vek em tih pawh thil hriat harsa tak a ni. Internet leh inbiakpawh theihna zawng zawng tihtawp vek a ni a, an state pawn aṭanga thil thlir ang ngawt hi thil awm dan a ni lo thei.

Social Media lama thu thehdarh ṭhenkhatah chuan Kashmir tualchhungah hian sipai-te an duty tir nasa hle tih te, ATM-ah pawisa lakchhuah tur a awm loh thu te, curfew puan a nih thu te tarlan a ni. State chhung mipuite hian harsatna nasa tak an paltlang mek tih erawh a hriat theih thung.