Foreign Minister hlui Sushma Swaraj a thi
Foreign minister hlui leh BJP veteran, Sushma Swaraj chu Thawhlehni zan khan kum 67 mi niin heart attack vangin a thi. Nimin tlai khan state chawimawina nen vuiliam a ni.
Thawhlehni zan dar 9:30 vel khan heart attack a neih avangin Sushma Swaraj hi Delhi-a All India Institute of Medical Sciences (AIIMS)-ah hruai a ni a, doctor-ten a nunna chhan tumin theihtawp chhuah mah se an chhan zo ta lo a ni. Sushma hian a pasal Swaraj Kaushal leh a fanu Bansuri-te a kalsan.
A ruang hi damdawi-in aṭangin a chenna, Janpath Road-a Dhawan Deep building-ah lak a ni. An in aṭang hian BJP headquarters-ah lak leh a ni a, he hmunah hian BJP hruaitu leh worker-ten zahna an hlan theihna turin nimin chawhnu dar 3 thleng khan dah a ni. BJP headquarters aṭang hian a vuina hmun, Lodhi Crematorium-ah lak phei leh a ni. Nimin tlaia a vuina hun hmannaah hian sorkar hotute bakah party hrang hrang hruaitute an tel ṭha hle.
Sushma Swaraj hi BJP hmeichhe hruaitu senior ber zinga mi a ni. Politician biak nuam leh ngainatawm tak niin, rampawn lama India mi harsatna tawkte a ngaihvenin, ṭanpui tura ngentute a ngaihven rang thei hle. Delhi hmeichhe chief minister ni thei hmasa ber a ni bawk.
A hriselna a ṭhat vak loh avangin kumina Lok Sabha inthlanpuiah pawh khan a chuh lo. Kum 2016 khan a kal (kidney) thlaksak a lo ni tawh a ni. Swaraj-i hian a thih hma lawk, Thawhlehni tlai khan a twitter-ah, Jammu and Kashmir special status pekna Article 370 tihtawp a nih vanga prime minister Narendra Modi a lawmpuina thu a ziak a, he hun lo thleng tur hi a lo nghahhlelh tawh thu a sawi.
Politics lama a zinkawng
1977-82 & 1987-90 :
Haryana Legislative Assembly member
1977-79 & 1987-90 :
Haryana cabinet minister
1990 :
Rajya Sabha member atan thlan a ni
1996 :
11th Lok Sabha member atan thlan tlin a ni
May-Jun, 1996:
Cabinet minister (Information & Broadcasting)
1998 :
12th Lok Sabha member atan thlan leh a ni
Mar-Oct, 1998 :
Cabinet minister (Information and Broadcasting) leh telecom (addl charge)
Oct-Dec, 1998:
Delhi chief minister
April 2000 :
Rajya Sabha member atan thlan nawn a ni
Sep 2000 - Jan 2003 :
Cabinet minister (Information and Broadcasting)
Jan 2003 - May 2004 :
Cabinet minister (health and family welfare and parliamentary affairs)
April 2006 :
Rajya Sabha member atan thlan leh a ni
2009 :
15th Lok Sabha member atan thlan a ni
Dec 2009 :
Lok Sabha-ah Leader of Opposition-ah thlan a ni
May 2014 :
16th Lok Sabha member atan thlan a ni
May'14 - May'19 :
Cabinet minister (external affairs)