Belagavi-ah ruahsur nasa vangin zirna inkhar

Karnataka-a Belagavi khuaah ruah a sur nasat avangin Belagavi district thuneitute chuan school leh college-te chu nimin aṭanga August 10 thleng kharna tur thupek an tichhuak.

Ruahsur nasa avangin tui level chuan nimin khan hlauhawm chhinchhiahna a pel a, ruah hi a la sur belh zel rin a nih avangin Karnataka khaw ṭhenkhatte chu inralring turin India Meteorological Department te'n an hriattir nghal bawk. Sangha mantute pawh sangha man rih lo turin Disaster management authority te'n an hriattir.

Belagavi khuaah hian ruah hi kar kal ta aṭang khan nasa takin a sur tawh a, ruahsur nasa hian nunphung a tikhaihlak tawh hle a ni. Ruahsur vang hian state chhunga khaw hrang hrangte'n harsatna an tawk mek a, Chikkamagadi khuaah chuan tui chim chin in an electric a khawih phak avangin loneitu kum 45 mi Lekhappa chuan a nunna a chan. Charmadi Ghat kawngte pawh khar a ni a, Dakshina Kannada Deputy Commissioner, S. Sasikanth Senthil pawhin lirthei reng reng Charmadi Ghat-a tlan turte chu lei tawlh tihfai a nih hma loh leh lei tawlh thut thei a la nih avangin, an him zawk nan tlan rih lo turin a hriattir.

Shivappa Nayaka Palace hmuna open air museum-a Jain ho milim 12 siam zinga ṭhenkhat chu thli leh ruah nasa tak avanga thingkung tluin a delh chhia a ni.