PM-in nawrh titawp turin loneitute a ngen Account 1,000 block turin Twitter hnenah ngenna thlen

Prime minister Narendra Modi chuan nimina Rajya Sabha inkhawma thu a sawiah, farm law thar pathum duh lohna lantira nawrh huaihawt mek, loneitute chu an nawrh titawp tawh tura ngenin, Minimum Support Prices (MSP) system chu hman chhun­zawm zel a tiam. 

Rajya Sabha-a Presi­dent Budget session speech chungchang sawi­honaah, PM chuan loneitute chu nawrh tihtawp a, inbiakna nei leh turin a sawi. "Inbiakna nei leh turin kan inhawng reng a, he House aṭang hian inbiakna nei leh turin ka sawm nghal cheu a ni," a ti. 

MSP system a awm reng dawn a, hemi chungchangah hian thu dik tawk lo thehdarh lo turin a ngen bawk. "Hma lam pan tur kan ni a, insiamṭhatna tura kan ruahmanna hi a ṭha tawk em tih enchhinna hun kan pek a ngai a ni," tiin PM chuan a sawi. 

Narendra Modi chuan sorkarna lo chang tawh apiangte chuan agriculture sector siam­ṭhatna chu an thlawp thu an lo sawi zel a, mahse tunah chuan heng party-te hi eptu lamah an awm leh tak avangin an ngaihdante chu an sut leh a ni, a ti. "Eptute hian nawrh huaihawt mek chungchangah sorkar an bei duh a nih pawhin aṭha vek e, mahse hemi rual hian loneitute hnenah hmasawnna thleng tur chuan thil thlak danglamte a ngai tih an hrilh tel tur a ni," tiin Modi chuan a sawi.

Sorkar hmasaten loneitute hmasawnna tur engmah an thlen thei lo tih sawiin, "Farm loan ngaihdam ṭhinte chu loneitu tenau zawkten an chhawr ve lo a ni," a ti. Hei vang hian a kaihhruai BJP-in central-a sorkarna a chan ṭan, kum 2014 aṭang khan loneitute thuam chakna turin agriculture sector lama hma lak dante pawh a thlak nasa a, crop insurance scheme pawh loneitute tana ṭha zawk turin thlak danglam a ni a, PM-KISAN scheme siamin, loneitu tenau leh rethei zawkte tan theihtawp an chhuah tih a sawi. 

Darkar khat chuang zet thu a sawiah, PM hian farm sector siamṭhat a ṭul chungchang a sawi ber a, hemi rual hian loneitute dodal mek, farm law thar pathumte chu sorkarin sut a tum lo tih a thu sawi aṭang hian a tilang a ni. 

Sorkar laipui chuan microblogging platform Twitter hnenah loneitute nawrh huaihawt mek kaihhnawiha thu dik tawk lo leh, boruak ṭha lo thlen thei zawnga thu post-na account 1,178 block turin ngenna a thlen. Account block tura ngente hi Pakistani leh Khalsitani user-te account an ni tih official chuan a sawi. He ngenna siam chungchang hi Twitter lam chuan a la chhang lo. 

January 31 khan ministry of electronics and information techno­logy chuan Twitter hnen­ah hian he thil kaih­hnawih vang bawk hian account 257-te block turin a lo ngen tawh a, Twitter chuan a lo block sak nghal a, mahse reilote hnuah unblock leh nghal an ni. 

Loneitute nawrh huaihawt mek thlawp zawnga ramdang cele­brity ṭhenkhatte tweet eng emaw zat chu Twitter global CEO Jack Dorsey chuan a lo like a, hei pawh hi sorkar laipui chuan a lo sawisel tawh bawk.