Ni 10 chhung Covid-19 vanga thi 150 hnuai lam ni tawh

Ministry of health and family welfare (MoHFW) chuan India ramah a zawnin ni 10 chhung chu Covid-19 hripui vanga thi nitin mi 150 aia tlem zel an ni tawh tih nimin khan a sawi. 

Hri darh zel tur venna atana khuahkhirhna ṭha tak kalpui vang te, contact tracing tih ṭhat vang te, test neih tam vangte leh hri kaite enkawlna mumal taka kalpui a nih avangin ram puma hripui thihpui rate hi a hniam hle niin ministry chuan a sawi a, hri kai hmuh chhuah thar pawh an tlem sawt hle tih a tarlang bawk. 

Ministry chuan sorkar laipui, state leh UT sorkarte thawhhona ṭha tak avangin ram chhunga hri leng pawhin ziaawm lam a pan a, hripui thihpui pawh an tlem phah niin a sawi. State leh UT 17-ah Pathianni khan Covid-19 vanga thi an awm lo a, state/UT 33-ah hri kai mek hi 5,000 hnuai lam an ni tawh bawk a ni.