J&K-ah khuahkhirhna thlah dul ṭhen

Jammu and Kashmir-ah ni nga chhung phone service leh internet service-te titawp a, mipui punkhawm khapna chu nimin khan thlah dul ṭhen a ni. 

Prime minister Narendra Modi chuan Ningani zana thu a sawiah, Muslim-te hun pawimawh Eid-ul-Adha an lawm turah J&K mipuite chuan harsatna engmah an neih loh tur thu a lo sawi tawh a ni.  Eid festival hi karleh hian neih a ni ang. 

Article 370 tihtawp a nih hnua khuahkhirhna siamte chu thlahdul ṭhen ni mah se, Kashmir Valley-ah chuan buaina thleng palh veng turin sipai ṭhahnem tak duty tir reng an ni. Khuahkhirhna thlahdul ni mah se Srinagar-a Jama Masjid gate-te chu khar an ni a, he mosque lian berah hian ṭawngṭaina hun hmang loin mosque-te zawkah hun an hmang thung tih official-te chuan an sawi. Boruak awm dan a ṭhat chhoh chuan khuahkhirhna pawh zau zawka thlahdul chhoh zel a nih tur thu an sawi. 

National Security Advisor Ajit Doval chuan nimin khan Sringar a tlawh a, thuneitute kawmin Kashmir mite tihduhdah leh tihnawmnah a thleng tur a ni lo tih a hrilh nia sawi a ni. Hetihlai hian political leader 400 vel chu hren an la ni mek a, an zingah hian chief minister hlui pahnih Mehbooba Mufti leh Omar Abdullah-te an tel. 

Jammu and Kashmir tana special status Article 370 ṭhiah a nih chungchanga Pakistan-in United Nations (UN) leh United Nations Security Council (UNSC) inrawlh tura a ngenna chu Pakistan beisei angin UN-in a chhang lo.

Pakistan hian UN Secretary General Antonio Gutteres hnenah lehkha thawnin India khuahkhirhna siam a ṭul thu a thlen a, mahse Antonio Gutteres chuan Ningani khan Kashmir buaina chu 1972 Shimla Agreement leh UN charter behchhanin, buaina chhuak lo zawnga chinfel ngai a nih thu a sawi.

Gutteres thupuangtu chuan  Secretary-General pawhin India leh Pakistan boruakah chuan 1972 Agreement, Shimla Agreement chungchang a sawichhuak tih sawiin, he inremnaah hian Jammu and Kashmir 'final status' chungchang chu buaina chhuak lo zawngin leh United Nations Charter anga chinfel tur a ni tih a inziah thu a sawi a ni.

Pakistan hian UN hi inrawlh turin duh hle mah se UN SG hian UN inrawlh ṭul a tihna lam thu engmah a sawi lang lo.

Prime minister Narendra Modi chuan August 5-a sorkar laipuiin Article 370 a tihtawp hnua a vawi khatna turin Ningani zan khan ram mipui hnena thuchah a sawi. 

Narendra Modi chuan Jammu and Kashmir chungchanga sorkar thutlukna siam chu na taka chhanin, Article 370 hian inlakhran duhna, eirukna leh chhungkaw inthlahchhawn rorelna bak engmah a siam lo a ni, a ti.  Pakistan pawhin firfiakte chetna thehdarhna hman­ruaah a hmang tih a sawi bawk. He Article vang hian Jammu and Kashmir leh Ladakh mipuite chuan an chanvo an nei thei lo a, hei hian hmasawnna a ti ṭhuanawp ṭhin a ni tiin, an hmasawnna daltu tihbo a ni ta chu J&K leh Ladakh mipuite a lawmpui thu a sawi. 

Modi chuan Article 370 tihtawp hi India ram chanchina bung thar a ni, tiin, Jammu and Kashmir leh Ladakh mipuite tan kawl a eng dawn a ni, a ti. Sorkar thiltih dan chu Sardar Patel, Dr. Babasaheb Ambedkar, Dr. Shayam Prasad Mookerjee, Atal Bihar Vajpayee leh ram leh hnam tana mi in pe tam takte duhthusam a ni, a ti. 

Article 370 chu ralthuam angah hman a ni ṭhin tih sawiin, PM chuan hel lakbo a, kalphung thar hman a nih chuan firfiaka chetna leh inlakhran duhnate a bo dawn a, J&K chu hmasawnna sang zawkah hruai thlen a ni dawn tih a sawi. 

Jammu and Kashmir state ṭhiat a, union territory pahniha ṭhen a nih hnuah J&K pawh sorkar laipui hnuaiah hun rei lote a awm rih ang a, mahse inthlanna zalen leh felfai tak buatsaih a ni thuai dawn tih Prime Minister chuan a sawi. Mipuite chu an aiawha roreltu tur thlanna hun ṭha siamsak ngei a tiam a, sorkar chunga rinna nghat ngam turin mipuite a chah.

J&K state sorkar hnuaia hnathawkte pawhin UT hnuaia thawkte hamṭhatna dawn ang an dawng ve thuai dawn tih PM chuan a sawi. J&K leh Ladakh-a central leh state sorkar hnuaia hnaruak hnawhkhahna tur pawh kalpui thuai a ni dawn a, tualchhung mite tan hna thawh tur tam tak a awm thei dawn a ni, a ti.

PM chuan Jammu and Kashmir, Ladakh leh India ram puma hmasawnna a thlen theih nana thuthlukna hi siam a ni tiin, remna leh muanna hi a pawimawh ber a, chawinun tum zel a ni ang, a ti. Prime Minister chuan Jammu and Kashmir thar, Ladakh thar leh India thar siam turin mi zawng zawngte a sawm a ni.