Tharoor lakah man theihna thupek tichhuak

Kolkata Magistrate Metro­politan Court chuan nimin khan Congress hruaitu Shashi Tharoor man theihna thupek a tichhuak.

Advocate Summeet Chow­dhury-in 'Hindu-Pakistan' chung­­chang a sawi avanga Tha­roor-a lakah thubuai a thehluh behchhanin, court chuan manna thupek hi a tichhuak a ni. 

Union minister hlui, Shashi Tharoor hian nikum July thlaa Thiruvananthapuram-a thu a sawinaah, Lok Sabha inthlana BJP thlan tlin leh an nih chuan 'Hindu Pakistan' dinna tur kawng a inhawng dawn tih a sawi a ni. "BJP hian India-ah Hindu lalram din an tum a, he an din tumna kawnga an thurinte hian minorities te chanvo a hnawl sak a ni. Hei hi kan ram hruaitu hlun Mahatma Gandhi, Nehru, Sardar Patel leh Maulana Azad-te ram hruai tum dan a ni lo," tiin Tharoor chuan a sawi.

A thusawi avang hian ni­kum July 12 khan advocate Chow­dhury hian metropolition magistrate court-ah Tharoor lakah petition a thehlut a ni. Chowdhury chuan Tharoor-a thusawi hian inhuatna thlenin, sakhaw intihbingna boruak siam tumna a ni, a ti. A thusawi avang hian Tharoor hian thupha a chawi duh lo tih a sawi bawk. 

Additional Chief Metropo­litan Magistrate M Dasgupta chuan Lok Sabha MP Shashi Tharoor chu August 14-a hearing neih leh turah  court-a inlan turin a hriattir bawk a ni.