Hong Kong airport-a India mite MEA-in ṭanpuidan ngaihtuah

Ministry of External Affairs (MEA) chuan Hong Kong International Airport-a India mi awm te hnenah airlines-te bia a, thlawhtheihna remchang hmanga thlawhchhuah theih dan tur ngaihtuah turin thurawn a pe.  

MEA chuan Hong Kong-a India mite tan Helpline +852 90771083 a siam sak bawk a, nimin khan buaina hi a punlun avangin thlawhtheihna cancel leh delay-a awm leh rin a ni bawk. Hong Kong sorkar laka lungawi lohna lantira nawrh huaihawt hian ziaawm lam a pan hlei thei lo a, thla hnih dawn an buai tawh a ni.

Airport-ah pawh nawrh hi an huaihawt a, hemi a nih avang hian Hong Kong airport chuan flight an cancel. Airport-ah hian ni nga chhung vel chu nawrh huaihawt a ni tawh. Thawhṭanni khan Hong Kong airport-a thlawhtheihna thlawk chhuak turte hi cancel vek an ni a, nimin khan hawn leh a ni. Mahse thlawhtheihna za chuangte chu cancel zingah an la tel.