Maha sorkarin Milarte tweet chhui chiang dawn

Maharashtra home minister Anil Deshmukh chuan lonei­tute nawrh huaihawt mek kaihhnawiha milarte tweet chungchang chu chhui chiang turin Thawhṭanni khan thupek a tichhuak. Heng zingah hian Sachin Tendulkar, Akshay Kumar, Lata Mangeshkhar leh milar dang eng emaw zat an tel. 

International pop star Rihanna-i'n India rama farm law duh loha loneituten nawrh an huaihawt mek chungchang a post hnuah, India rama milar, Bollywood star leh cricket player ṭhnekhat chuan chhang letin, 'India together' drive an kalpui a ni. 

Milarte thil post chung changah hian Congress chuan Deshmukh hnenah hian com­plaint thehlutin, minister hian chhui chiang turin a ti ta a ni. Congress party chuan milarten Rihanna tweet an chhan letnaah hian an thu tweet-te kal khat vek niin, an post hun pawh a thuhmun deuh vek a, hei vang hian chhui chian a ngai hle tih an sawi. 

Congress hruaitu Sachin Sawant chuan loneitute chung­chang Rihanna-i'n a sawi chhuah hnuah sorkar chu a rawn ṭawng chhuak nghal a, hemi hnu lawk hian milarten sorkar thlavang hauh zawnga an tweet tam tak a rawn awm nghal a ni, a ti. "Mi tu pawh, mi lar pawh ni se an ngaihdan an sawichhuak a nih chuan a ṭha vek a ni. Mahse loneitute chungchanga an tweet ho hi a rinhlehlawmin, a phenah BJP an inrawlh ngei niin a lang. Milar ho tweet-ah hian ṭawngkam in ang tak tak an hmang hlawm a ni," a ti. 

Hei vang hian milarte thu tweet chungchang hi chhui chian a ṭul tih sawiin, minister hnen­ah an thlen hnuin state intelli­gence department chhui chian tir an ni dawn ta a ni, a ti.