Sashi Tharoor leh journalist 6-te man hrih dawn lo

Delhi-a January 26-a loneituten tractor rally an huaihawt ṭuma buaina chhuak chungchang an tweet avanga Congress MP Shashi Tharoor leh jounalist paruk thubuai siamsakte chu man an ni dawn rih lo. 

Nimin khan Supreme Court chuan Tharoor leh journalist-ten thubuai siamsak an nih chungchanga petition an thehluh chu ngaihtuahin, kar hnih hnuah ngaihtuah chhunzawm tura dahin, manna tur thupek tihchhuah chu an 'stay' tih chief justice of India SA Bobde chuan a sawi. 

CJO Bode kaihhruai justice AS Bopanna leh justice V Ramasubramanian awmna bench chuan Tharoor leh journalist - Rajdeep Sardesai, Zafar Agha, Mrinal Pande, Vinod K Jose, Paresh Nath, leh Anant Nath-te petition thehluh hi an ngaihtuah a ni. 

Soliticor-general Tushar Metha chuan thubuai siamsakte tweet-in mi nuai tel laka nghawng ṭha lo tak a neih thu sawiin, an petition hi vawiina ngaihtuah leh nghal turin a ngen a, mahse court chuan a hnawlsak a ni.