Congress party-in 'online warrior' nuai nga neih tum

Congress party chuan Thawhṭanni khan 'Join Congress Social Media' campaign hawngin, social media lama inhuatna chawk chhuak thei leh thu dik tawk lo thehdarh ṭhin lo bei let turin online warrior volunteer nuai nga neih a tum. 

Party hruaitu Rahul Gandhi chuan video message hmangin social media campaign hi a hawng a, thudik tak pholan zel a nih theihna turin India chuan non-violent warrior a mamawh a ni, a ti. 

Video message a tichhuahah Gandhi chuan, "Ṭhangtharte chuan thil thleng hi in hre vek a ni. In lak aṭangin, in school, college leh university aṭangin engmah thup theih a ni lo," tiin loneitute chunga thil thlengte chu an hre thei vek a ni tiin, hetianga beihna/indona lo chhuahna chhan ber chu 'troll army' ho vang a ni, tih a sawi. Inhuatna chawk chhuak zawng leh, midang tihthinurna thu thehdarhtu mi sang telte chu hetianga ti tura sum pek an nih thu sawiin, hetihlai hian boruak ṭha leh muanawm a awm a, thudik lo thehdarh ṭhinte bei let tur mi huaisen an mamawh thu a sawi. 

Rahul Gandhi chuan India ram venghim a, dawt thu thehdarh ṭhin doletna tur platform an siam chu zawm a, online warrior ni tur hian ṭhalaite a sawm a ni. AICC social media head Rohan Gupta chuan prime minister Narendra Modi kaihhruai sorkarin social media a hlau nia sawiin, ṭhalaite tan ram siamṭhatna tura an aw an chhuah theihna tur plaftorm hi an siamsak tih a sawi bawk.