Bihar CM-in cabinet a tilian

Bihar chief minister Nitish Kumar chuan nimin khan a cabinet tilianin, minister thar 17 lakluh an ni. 

Nikum November thlaa assembly inthlan neihah National Democratic Alliance (NDA) chuan hnehna an chang a, November 26 khan Janata Dal-United hruaitu Nitish Kumar chu Chief Minister atan lakluh a ni a, minister hi 13 chauh a la ruat a ni. 

BJP aṭangin pasarih, JD(U) member panga, leh NDA hnuaia an thawhpui party tenau zawk, Hindustani Awam Morcha leh Vikassheel Insaan Party aṭangin minister pakhat ve ve dah an ni bawk. Bihar hian dan ang chuan minister hi 36 chin ruat theih a ni. 

Nimina minister atana lakluh thar zingah hian union minister hlui Shahna­waz Hussain pawh a tel. Governor Phagu Chauhan-a'n Raj Bhavan-a rinawmna thu a tiamtir zingah hian JD(U) hruaitu Sanjay Kumar Jha, Sharvan Kumar, Lesi Singh leh Madan Sahni leh BJP MLA Pramod Kumar-te an tel bawk a, anni hi sorkar hmasaah pawh minister lo ni tawhte an ni. 

Seat 243 awmna Bihar assembly-ah hian BJP chu party mala seat ngah ber niin member 74 a nei a, JD(U) hian seat 43 a nei bawk.