Rajya Sabha-ah Citizenship Bill kan dodal dawn : JD (U)

Tun hnaia chai hlawh leh sawisel kai tak Citizenship (Amendment) Bill, 2016 chuan dodaltu a neih chhunzawm zel. Bihar lama Bharatiya Janata Party (BJP) thawhpui lian ber Janata Dal (United) chuan Rajya Sabha-a he bill hi pharh a nih hunah a dodal zawnga an vote tur thu a sawi.

JD(U) General Secretary leh thupuangtu ni bawk KC Tyagi chuan, "Kan party hruaitute chuan hemi chungchangah hian thutlukna an siam tawh a. Ram Temple emaw Article 370 a ni emaw mipui nawlpui chungchangah chuan kan dinna ngaiah kan la ding reng a ni. Citizenship (Amendment) Bill-ah pawh hian chutiang tho chu a ni," tiin an thawhpui BJP chet lak dan chu thlawp an tum lo tih a sawi.

Tyagi hian Lok Sabha-a he bill pharh a nih laia Congress MP an chhuah tauh pawh a sawisel nghal a, he bill kaihhnawih thilah an party hruaitute chuan Assam an tlawh vat tur thu a sawi tel bawk.

Intellingence Bureau chuan Citizenship (Amendment) Bill hi hman a nih chuan Afghanistan, Bangladesh leh Pakistan aṭanga India rama pem lut mi 31,000 velin an chhawr ṭangkai nghal tur thu Joint Parliamentary Committee hnenah a hrilh. IB Director Rajiv Jain chuan an record-a a lan danin, tunah hian heng ram pathum aṭanga India rama rawn lut, long term visa pek mek hi Hindu 25,447, Sikh 5,807, Kristian 55, Buddhist 2 leh Parsis 2 an awm a, heng mite hian India khua leh tui nih hi an duh vek a ni, a ti. He bill hi House pahnih-ah a tlang a, law-a chantir a nih chuan heng mite hnenah hian India khua leh tui nihna pek nghal theih a ni dawn a ni, tiin a sawi. 

Citizenship (Amendment) Bill, 2016 hi Parliament Winter Session-ah khan Lok Sabha-ah pass a ni tawh a, Rajya Sabha-ah  pharh a la ni lo. Rajya Sabha-ah hian BJP kaihhruai NDA hian majority a nei pha lo a ni. He bill hi a bikin hmarchhak bialah nasa taka dodal niin, bill duh lohna lantir chhunzawm reng a ni.