Mehul Choksi-a'n Indian citizenship a thlauhthla

Punjab National Bank (PNB) sum tam tham tak tichingpentu Mehul Choksi chuan India khua leh tui a nihna a thlauhthla a, a passport pawh a tlanchhiatna ram Antigua sorkar hnenah a thehlut bawk. 

Lunghlu hmanga sumdawng hausa Choksi hi PNB pawisa cheng vaibelchhe 13,000 zet tichingpenah puh a ni a, a thubuai ngaihtuah a nih hmain January 2018 khan Antigua-ah a tlanchhe ta a ni. Choksi-a'n India khua leh tui a nihna a thlauhthlak chhan hi India rama a lo kir tawh lohna turah an ngai a ni.

Choksi hian India rama a thubuai neihte tlansan tum mah se Prime Minister Narendra Modi chuan India sorkar pawisawitute chu India rama an lakkir leh vek tur thu a sawi thung. Modi chuan, "Kan sorkar chhunga India tlanchhiatsan tute hi hruaikir vek an ni ang. Sorkar inbiakna mai bakah dan hmangin an thil neihte hrensak an ni. India pawisa tichingpentute hi chuan bo leh bang awm loin an rul leh vek tur a ni," tiin Choksi tan a thubuaite tlanchhiatsan theih a nih loh tur thu a sawi.

Choksi chuan a thubuai neihlaiah hian thiam lohna a neih loh thu a sawi tawh a, a hriselna a ṭhat loh avangin Antigua aṭanga India ram pan tura darkar 14 lai a ngaih avangin a hriselnain a tlin loh thu a sawi ve thung.