CBI hotu ruattu tur committee ṭhukhawm dawn

Alok Verma a ban hnuah Central Bureau of Investigation (CBI)-in Director nghet an la nei lo a, Ningani hian CBI Director ruattu tur committee an ṭhukawm dawn.

Committee-ah hian Prime Minister Narendra Modi, Chief Justice of India Rajan Gogoi  leh Lok Sabha-a Congress hotu Mallikarjun Kharge-te an tel a, Director thar ni tura hming lamrik zingah J K Sharma leh Parminder Rai-te chu hming ri ring pawl an ni.

Kum 2019 January-a pension tawh tur Rai hi Haryana-a State Vigilance Bureau-a Director General nilai a ni a, CBI lama tawnhriat a neih loh avangin sawiseltu an awm nual thung. Home Ministry-a Special Secretary (Internal Security) nilai Rina Mitra pawh hi hming ri ring ber pawl a ni a, CBI-ah kum nga lai a lo thawh tawh avangin a buk rit pawl a nih mai ringtu an ṭhahnem hle.

CBI Director thar ruattu tur committe-a a tel avangin Chief Justice of India Rajan Gogoi chuan CBI interim chief atana M Nageswara Rao ruat a nih an khing letna ngaihtuahnaah a tel dawn lo tih a sawi. CBI Director aṭanga Alok Verma ban anih hnuah hotu lailawk atan Rao hi a dah a ni a, mahse hei hi mi tam takin an sawisel a, Supreme Court-ah interim chief atana Rao ruat a nihna hi ngaihtuah ṭha turin leh  hnawl turin an ngen a ni. He petition hi NGO Common Cause thehluh a ni a, CJI kaihhruai bench ngaihtuah tura tih a ni a, mahse CJI hian he thubuai aṭang hian inrawlh a tum loh thu a sawi vangin Justice AK Sikri kaihhruai bench-in January 24 vek hian a ngaihtuah dawn ta a ni.