Delhi Airport-ah J&K politician Shah Faesal dang Srinagar-ah house arrest-in hreng zui nghal

Jammu and Kashmir politi­cian, Shah Faesal chu nimin khan Delhi Airport-ah hrengin, India ram a chhuahsan tur dan a ni. Srinagar-ah thawn kirin, house arrest-a hren zui nghal a ni. 

IAS officer a nihna aṭanga bang a, politics luhchilhtu Shah Faesal hi Peoples Movement party president nilai a ni. Prime minister Narendra Modi kaih­hruai NDA sorkar sawisel a, sorkar laipuiin J&K special status pekna a tihtawp na taka dodaltu a ni. Nimin khan Srinagar aṭanga Delhi a pan chu ram pawn lama a zinchhuah venthawn thilah Delhi Airport-ah lo hren nghal a ni. Faesal hi Instanbul-ah zin a tum nia sawi a ni a, mahse airport aṭang hian Srinagar-ah thawn kir leh nghal a ni. 

Faesal hian Thawhlehni khan a twitter-ah, Kashmir-ah chuan political rights tundin a nih theihna turin tharum thawhna tel lo movement kalpui a ngaih thu a sawi. Article 370 tihtawp a nih kaihhnawihah Faesal hma hian J&K politician eng emaw zat chu house arrest-a hren an lo ni tawh. An zingah hian chief minister hlui Omar Abdullah leh Mehbooba Mufti te pawh an tel. 

Kashmir Valley-ah chuan nimin thleng khan phone leh internet service-te tihtawp a la ni a, hmun ṭhenkhatah curfew puan a la ni bawk. Jammu-ah erawh chuan khuahkhirhna hlih a ni tawh thung. Home  ministry chuan boruak awmdan a zirin khuahkhirhna hi a tahtawlin thlah dul chhoh zel a ni dawn tih a sawi. 

J&K governor Satya Pal Malik chuan foreign media-ten Kashmir Valley-ah Article 370 tihtawp a nih hnuah Kashmir Valley-ah buaina lian tak tak a chhuak nia an sawi chu thu dik lo a ni, a ti. Police-te pawhin kar kal ta kartawpa khuahkhirhna thlah dul a nih khan Srinagar-ah chuan buaina tenau chhuak a awm a, mahse tunah chuan engkim thunun vek tawh a ni tih an sawi.