Chandrayaan-2 Khawvel orbit chhuahsan fel
India moon mission pahnihna ‘Chandrayaan-2’ chuan nimin zing khan khawvel orbit a chhuahsan fel a, Thla lam a pan zel.
Indian Space Research Organisation (ISRO)-in an kahchhuah aṭanga ni 23 liam hnuah khawvel orbit hi a chhuahsan fel a, Bengaluru-a hmunpui nei space agency chuan Nilaini zingkar dar 2.21-ah khan ṭanhmun siam nghehna ‘Trans Lunar Insertion’ (TLI) tia sawi chu a kalpui tih sawiin, hemi hnu hian Lunar Transfer Trajectory hlawhtling takin a lut tih an sawi.
Ruahman anga thil a kal zel a nih chuan Chandrayaan-2 hian August 20 hian Thla orbit a lut ang a, September 20-ah a ṭum ang. ISRO chuan July 22-a kahchhuah a nih aṭang khan pangngai takin thil a kal tih sawiin, spacecraft dinhmun chu enfiah reng a ni, an ti bawk.
Chandrayaan-2 hian Thla orbit a luh theihna atan hian August 20 hian a engine tihnun leh a ni dawn tih Indian Space Research Organisation chuan an sawi a ni. Indian hian tuna a Moon mission kalpui hi a hlawhtlinpui a nih chuan Russia, US leh China dawta Thlaa soft landing hlawhtling taka kalpui leh thei tur ram a ni ang. Thla chhim tawp lama mission kalpui hmasa ber a ni bawk ang.