India leh China hi Ram ṭhang mek an ni tawh lo: Trump
US president Donald Trump chuan Thawhlehni khan Pennsylvania-a thu a sawinaah India leh China, Asia economic giant pahnihte chu ram ṭhang mek (developing country) an ni tawh lo, a ti.
Donald Trump chuan India leh China chu World Trade Organisation (WTO) aṭanga hamṭhatna duh vanga ram ṭhang meka la inchhalah a puh a, chutianga an khawsak reng chu a phal tawh dawn lo tih a sawi. Trump hian India chu US bungruaa chhiah a lak tam avangin a lo sawisel fo tawh a, 'tariff king' ti tein a lo sawi hial tawh.
Trump hian July thla khan WTO chu developing-country status an sawifiah dan tichiang turin a lo ti tawh bawk. Hetihlai hian India leh US aiawhte hian insumdawn tawnna lama an inhriatthiam lohna chungchangah New Delhi-ah meeting an nei tawh thung a ni.
US President chuan, "WTO chuan China leh India chu ram ṭhang mek angin a hmu a ni. Mahse an ṭhang zo tawh," tia sawiin, WTO aṭanga hamṭhatna um chu US chuan a remti dawn lo tih a sawi bawk.