Kerala CM-in Anti-CAA resolution Governor a chhiar tir

"Chief Minister zahawm takin ti tura min duh angin he para hi ka chhiar chhuak dawn a, kei chuan hei hi policy emaw programme emaw hnuaia awmnaah ka ngai lo a ni. Chief Minister chuan sorkar thlir dan a ni tih sawiin, a duhdan ka zahna lantir nan he para hi ka chhiar dawn a ni"- Governor Arif Mohammad 

Kerala state Assembly-ah Nilaini khan state governor Arif Mohammad Khan chuan sorkarin Citizenship (Amendment) Act, 2019 (CAA) duh lohna lantirna resolution a siam chu a chhiar chhuak a, a pawm zawng erawh a nih ve loh thu a sawi thung.

Left rorelna Kerala state sorkar hi CAA duh lohna resolution pawm hmasa ber state an ni a, Arif Mohammad Khan resolution chhiar chhuak tura a kal hi eptu MLA lam chuan an duh lo hle a, a kalna turte lo dangin an lo aubuai a ni, hemi avang hian podium a panna kawngah hian security-te chuan an veng hial. 

Anti-CAA resolution chu a duh reng vanga chhiar chhuak a nih loh thu leh chief minister Pinarayi Vijayan duh anga chhiar chhuak a nih thu a sawi. A thu chhiar chhuak paragraph 18-naah hian, "Khua leh tui nihna chu sakhuana behchhana siam a ni ngai tur  a ni lo, hei hi Constitution basic structure kalh a ni," tih a inziak.

Khan hian CAA chu sorkar laipui issue a ni tih sawiin, state chuan thuneihna an nei lo tih a sawi bawk. An state-in resolution an siamah chuan a lawm lo tih sawi lang bawkin engtin nge Court sang ber an dawr dawn tih a zawt zui bawk a ni.