Ram pumah I-Day lawm a ni

India zalenna ni champha, Independence Day vawi 73-na chu nimin khan ram pumah lawm a ni, a lawmna pui ber chu New Delhi-a Red Fort-ah neih a ni. 

Prime minister Narendra Modi chuan Delhi-a Independence Day lawmnaah thu sawiin, minute 92 chhung thu a sawi. Kum ruk chhung a zawna Independence Day lawmnaa thu a sawina a ni. Nimina PM thusawi hi I-Day thuchah a sawi tawh zinga a rei ber dawttu a ni a, kum 2016 khan minute 94 chhung thu a lo sawi tawh a ni. 

PM Narendra Modi chuan tunlaia rampum ngaihven, Jammu and Kashmir special status pekna Article 370 tihtawp a nih chungchang a sawichhuak. 

Modi chuan Article 370 titawp tura sorkarin thutlukna a siam chu fakin, "Kan ran zalenna sualtute chuan ram zalen a awm theihna atan hun rei tak an bei a ni. Mahse Article 370 leh 35A avangin harsatna a awm phah fo thung. Mahse vawiinah chuan India ram chu ram pakhat, ram danpui pakhat hnuaia awm kan ni ta tih chhuang takin ka sawi thei ta a ni," a ti. Kum 70 zet Kashmir bialah inremna a awm theih loh avangin ngaihtuahna thar hman a ṭul tawh tih a sawi. 

PM chuan army force pathumte thawhhona ṭha zual a awm theihna turin Chief of Defence Staff (CDS) post siam a ni dawn tih a sawi. Modi chuan armed force-te chu India mi tupawhin an chhuang em em tih sawiin, hun inthlak danglam chhoh ve zel angin force-te inkara thawhhonna pawh tuaihriam chhoh ve zel a ngai a ni, a ti. 

Prime minister chuan ram chhunga hmun hrang hranga infrastructure tihchangtlunna turin cheng vaibelchhe 100 ruahman a nih thu a sawi. Kum nga chhunga Indian economy a leta tihpun a, dollar trillion 5-a tihpun tumna pawh harsa angin lang ṭhin mah se, a hlawhtling ngei dawn tih a ring nghet tlat tih a sawi. India sorkar chu a ngelnghet a, economy pawh a chak tawk tih a sawi bawk. 

Prime minister chuan in tina tui pekna tura hmalakna, Jal Jeevan Mission tan cheng vaibelchhe nuai 3.5 dah a nih thu a sawi. PM chuan mipuite chu tui humhalh turin a ngen a, Swachh Bharat campaign an ngaih pawimawh anga dah pawimawh turin a ti. 

73rd Independence Day lawmna puala Red Fort-a thu a sawiah, PM Modi chuan, "Sorkar chuan in tinin anmahni in aṭang ngeia tui an herhhaw theihna turin Jal Jeevan Mission chu a kalpui zel dawn a, he mission atan hian cheng vaibelchhe nuai 3.5 chuang kan dah leh a ni," a ti. He mission tihhlawhtling tur hian sorkar laipui leh state sorkarte an thawkho zel dawn tih a sawi. Jal Jeevan Mission hian kum 2024-ah thingtlang bial china in tinah pipe hmanga tui pek vek hman a tum a ni.

PM Modi chuan India ram aṭanga retheihna umbo turin a kaihhruai sorkar chuan theihtawp a chhuah zel dawn tih a sawi. Mipuite beiseina pawh a inthlak danglam chho zel a, "Pukka road ringawt te, darkar rei lote electric eng neih leh rel station neih ringawtahte mipui an lungawi tawh lo. Tunah chuan kawngpui pawh four lane, electric 24 hrs eng leh airport-te kan duh tawh a ni," tiin a sawi. 

Modi chuan tourism sector tihlenna leh facility ṭha zawk a awm theihna turin ram mipui, upper-middle class chin chu ramchhung hmun hrang hrang tlawh tam turin a chah. 

PM chuan kum 2022-ah ramchhunga tourist hmun pawi­mawh 15 tal tlawh turin a ti a, "Ram dangah holiday hmang turin an zinchhuak fo tih ka hria. Mahse zalenna kan hmuh champha vawi 75-na, kum 2022-a thleng tur pualin ramchhunga hmu 15 tal tlawh kan tum thei dawn lawm ni?" tiin a sawm.