Kolkatta-ah 'United India' rally huaihawt

West Bengal Chief Minister leh Trinamool Congress hotu, Mamata Banerjee-i chuan kar kalta Inrinni khan Kolkatta-ah eptu ṭangrualte pualin 'United India' rally a huaihawt a, he hunah hian eptu party hrang hrang aṭangin party hruaitu  25 an tel. 

Eptu party hrang hrangte chuan Lok Sabha inthlanpui awm turah BJP bei tura thawhho an duh a, an thawhhona tinghet tur hian state dangah pawh rally neih chhunzawm an remti a, hei bakah hian hma lak dan tur ruahmanna siam pawh an remti bawk. 

Inrinni-a Kolkatta-a rally-ah hian Jammu and Kashmir National Conference leader Farooq Abdullah, prime minister hlui leh JD(S) leader H D Deve Gowda, AAP leader leh Delhi CM Arvind Kejriwal, TDP leader leh Andhra Pradesh CM Chandrababu Naidu, SP leader Akhilesh Yadav, RJD hruaitu Tejashwi Yadav, Loktantrik Janata Dal leader Sharad Yadav, DMK hruaitu M K Stalin, AIUDF hotu Badruddin Ajmal leh JMM hruaitu Hemant Soren-te chuan eptute thawhho pawimawh thute an sawi. Congress aiawhin party senior leader Mallikarjun Kharge a tel a, Sonia Gandhi thuchah a chhiarchhuak a ni. 

Party hruaitu dang NCP leader Sharad Pawar, NC Omar Abdullah, Karnataka Chief Minister H D Kumaraswamy, Patidar leader Hardik Patel, Dalit leader Jignesh Mevani,  Arunachal Pradesh CM hlui Gegong Apang, Zoram Nationalist Party leader Lalduhawma, RLD vice-president Jayant Chaudhary, BSP leader Satish Mishra, Karnataka Chief Minister leh JD(S) leader H D Kumaraswamy, NDA minister hlui Arun Shourie and Yashwant Sinha, bakah BJP MP Shatrughan Sinha-te pawh an tel. 

Rally-ah hian tel an ṭhahnem hle a, mi maktaduai khat chuang an tel niin a buatsaihtute chuan an sawi.

Prime Minister Narandra Modi chuan eptute rally huaihawt hi a sawisel zui nghal a, eptuten Modi-a duh lohna lantira rally huaihawt an tum chu mipui nawlpuiten an pawmpui lo tih sawiin, anti-Modi chauh ni loin, India mipuite dodalna rally a ni tel a ni, a ti. Eirukna umboa tuma a hmalakna avangin politics lama a khingpuite chuan inchhanhim nan thawhho an tum ta a ni, a ti zui bawk. 

Mamata Banerjee-i leh TDP leader Chandrababu Naidu-te chuan PM thusawi hi an chhanglet ve nghal a, eptu hruaitute chu PM chhiahhlawh, a duh dan ang anga a lamtir theih an ni ve lo tih an sawi. AP CM Naidu chuan, "He ram mipuite hi kan zalen a, PM hian a chhiahhlawh anga awm turin min duh a, mahse kan ni lo a ni" a ti. Political  hruaitute chu ram mipute chhiahhlawh zawk an nih tih a sawi nghal bawk. 

West Bengal CM Banerjee-i pawhin BJP chuan an state mipuite hmachhawn chu an hlau tih sawiin, an rally neih tak nuihsawh taka a sawi chungchangah PM chu inthlanpui lo awm turah a chhanna an pe mai dawn tih a sawi.