J&K-a khuahkhirhna thlahdul ṭan

Sorkar laipui chuan Jammu and Kashmir-a khuahkhirhna a siamte chu a tahtawla thlahdul chhoh a tum. 

Jammu and Kashmir chief secretary BVR Subramanyam chuan kar leh Thawhṭanni aṭangin Kashmir Valley-a school leh college-te chu hawn an ni tawh dawn tih a sawi. Chief secretary chuan public transport-te pawh tlan tir an ni thuai dawn tih a sawi a, sorkar office-te chuan nimin aṭang khan hna an thawk leh ṭan tawh bawk. 

Subramanyam chuan press conference a neihah, vawiin aṭangin Srinagar hmun tam zawkah telephone pawh hman theih a ni dawn tih a sawi. Hemi hma hian union home ministry chuan landline, mobile leh internet connection tihnun chungchang chu district thuneituten ṭul an tih angin an kalpui dawn tih a sawi.

Chief secretary chuan state chhung boruak chu a pangngai chho thuai dawn tih a sawi a, Article 370 tihtawp a nih avanga lungawi lohna lantirte awm mah se, buaina liantham chhuak a awm lo a, nunna chan pawh an awm lo tih a sawi. District 22 zinga 12-ah chuan nunphung a pangngai tawh tih sawiin, hemi rual hian buaina a chhuah palh venthawn thilah venhimna lam uluk taka kalpui reng a ni, a ti. 

Sorkar lamin boruak a ṭha chho zel tawh nia an sawi laiin, August 5-a Article 370 tihtawp a nih dawn vanga chief minister hlui Omar Abdullah leh Mehbooba Mufti bakah politician eng emaw zat house arrest-a hrente chu tun thlengin chhuah an la ni lo. 

Ramsa angin Kashmiri bawm chhungah khung: Mehbooba Mufti fanu Jammu & Kashmir chief minister hlui Mehbooba Mufti fanu Sana Iltija Javed chuan union home minister Amit Shah hnenah August 15 khan lehkha thawnin, "Ramsa angin Kashmir mite chu bawm chhungah khung an ni a, an dikna chanvo chhuhsak an ni," a ti.

Sana Iltija Javed chuan media mite  hnena a ṭawngchhuak leh a nih chuan rapthlak taka enkawlah vau a ni bawk tih a sawi. August 4-a Mehbooba Mufti leh Omar Abdullah-te house arrest an nih hnu khan Sana Iltija hi thuthar thehdarhtu tam takin interview-in a vocie message-te pawh tlangzarh a ni.

" Vawiin hian ramchhung hmun dang zawngah India Independence Day an lawm laiin, Kashmiri-te chu ramsa ang maia khungkhawm niin an dikna chanvo chhuhsak an ni," tiin lehkha thawnah hian a ziak. A in aṭanga chhuah phalsak a nih loh thu sawiin, a in chhuahsan phal a nih loh chhan chu sawifiah turin minister chu a phut bawk. Tlawhtu neih pawh phalsak a ni lo a, political party inhnamhnawihna a nei lo chunga an enkawl dan chu mak a ti hle a ni.