Nuclear hman hmasak chungchanga India dinna thlak a ngai mai thei: Rajnath Singh

Union defence minister Rajnath Singh chuan nimin khan Nuclear hman hmasak chungchanga India dinna thlak a ngai mai thei tih a sawi.

Rajnath Singh chuan India chuan 'nuclear ralthuam hman hmasak loh' policy chu a la kalpui reng tih a sawi a, mahse hun lo kal leh zel turah India chuan a policy chu a thlak a ngai mai thei a ni, a ti.

Defence minister chuan a twitter-ah Rajasthan-a Pokhran a tlawh chungchang a tarlang a, Pokhran hi 1974 leh 1998-a India-in nuclear a test-na hmun a ni. Prime minister hlui Atal Bihari Vajpayee kha nuclear ralthuam test a nih ṭum hnihnaa hmalatu ber a ni nghe nghe.    

"Pokhran hi Atal Ji-a'n India nuclear power-a a siamna hmun kha a ni a, chuti chung chuan 'hman hmasak loh policy' chu India thu tihtluk a ni. He thurinah hian India chu a la ding reng. Thil thlen zel danin hun lo la awm turah eng nge a hrinchhuah tih chu a hril ang," tiin a tweet.

Nimin khan Atal Bihari Vaj­payee thih cham a ni a, nikum khan kum 93 mi niin All India Institute of Medical Sciences (AIIMS)-ah a thi a ni.