President in Arun Jaitley tlawh

Union finance minister hlui Arun Jaitley chu a dinhmun a ṭha lo hle nia sawi a awm avangin nimin khan president Ram Nath Kovind chuan enkawl a nih mekna hmun All India Institute of Medical Sciences (AIIMS)-ah a tlawh.

President bakah hian union health minister Harsh Vardhan leh minister of state for health Ashwini Choubey-te pawhin an tlawh ve bawk.

AIIMS doctor-te chuan Jaitley chu uluk taka enkawl mek a ni tih leh intensive care unit (ICU)-ah dah a ni tih an sawi. Arun Jaitley hi May thlaah pawh khan AIIMS-ah hian admit a lo ni tawh a, a hriselna ṭhat loh avang hian kumin Lok Sabha inthlanah pawh khan a ding lo a, BJP-in sorkarna an siam tirh khan Prime Minister hnenah lehkha thawnin eng mawhphurhna mah pek a duh loh thu a thlen.

Nikum khan AIIMS-ah hian a kal thlak a lo ni tawh bawk. Kar hmasa khan AIIMS-ah hian dah luh leh a ni a, Inrinni hmasa pawh khan vice president Venkaiah Naidu chuan a lo tlawh tawh bawk.