Manipur history chungchangah RSS-te programme siam khapsak

Manipur-a zirlai pawl palite chuan Rashtriya Swayamsevak Sangh (RSS) chu Manipur history chungchanga programme an huaihawt an khapsak. 

RSS hian Thawhlehnia Lamyanba Shanglen-a 128th Patriots Day an hmannaa Manipuri freedom fighter pahnih, prince Bir Tikendrajit leh Thangal General-te thlalak inkara Bharat Mata thlalak an dah chu Manipur zirlai pawlte chuan an duh lo a ni. 

Joint Students' Cooridination Committee (JSCC) chuan Manipur history chungchangah an lo inrawlh ve chu duh loin, RSS chu Manipur mipuite hnena thupha chawi turin an phut. Social worker Y Kiran pawhin Manipur-a pasalṭha pahnih thlalak inkara Bharat Mata thlalak dah chu state leilung fate tana chona a ni tih sawiin, Patriot's Day hlutna a tihniam niin a sawi. 

Hetihlai hian RSS member-te chuan Manipur history tihdanglam tumna an nei lo tih sawiin, kum hmasa lamah pawh hemi ni hmanaah hian Bharat Mata thlalak chu dah a ni tih an sawi. Kuminah chuan thlalak dahna hmun awl a awm loh avangin Manipuri freedom fighter pahnihte thlalak inkarah hian dah a ni ta mai a ni, an ti.