Priyanka Gandhi-in politics luhchilh ta UP East-a Congress Gen Secy atan ruat a ni

Prime Minister hlui Rajiv Gandhi-a fanu, Priyanka Gandhi Vadra chuan politics a luhchilh tak tak dawn ta. Congress Party president Rahul Gandhi chuan Uttar Pradesh East-a All India Congress Committee General Secretary atan a farnu Priyanka Gandhi Vadra hi a ruat. 

Priyanka Gandhi hian a chanvo hi February chawlhkar hmasa ber aṭangin a chelh ṭan dawn a, Lok Sabha inthlanpui awm turah pawh Gandhi chhungkaw bial, Rae Bareli-ah a chuh maithei nia sawi a ni. He bial hi a nu, Sonia Gandhi bial nilai a ni. 

Kum 47 mi, Priyanka Gandhi hian a hmain a nuṭa Rahul Gandhi leh a  nu Sonia Gandhi-te bialah hian campaign pui ve ṭhin mah se, politics hi a la luhchilh tak tak lo a, party-ah chanvo pawimawh pawh a la chelh duh lo a ni. 

Congress senior leader Motila Vohra chuan Priyanka Gandhi hnena mawhphurhna pawimawh tak pek chu thil pawimawh tak a ni tih sawiin,  hei hian Uttar Pradesh mai ni loin ram chhung hmun dangah an party tan pawh nghawng ṭha tak a neih tur thu a sawi.  Hemi rual hian Uttar Pradesh hi hun rei tak Congress chet ṭhat tawh lohna state a nih avangin Priyanka tan pawh an party dinhmun siamṭha tur chuan a hna hi a hautak dawn hle a ni. Congress hian UP-ah hian Lok Sabha seat hnih chiah an nei mek a ni. 

Congress party chuan Uttar Pradesh West-a General Secretary atan Jyotiraditya Scindia a ruat bawk a, KC Venugopal chu Congress General Secretary (Organisation)-ah dah a ni bawk.  Venugopal hi  Karnataka-a AICC General Secretary in-charg a la ni zui bawk.

Uttar Pradesh hi Lok Sabha-a seat nei ngah ber state niin seat 80 a nei a ni. He state-a chak hian central lamah nghawng a neih thui avangin  party hrang hrang pawhin  ṭan an la hle. UP-ah hian BJP kaihhruai NDA, Samajwadi-Bahujan Samaj Party thawkdun leh Congress party-te chu an inbeih tawk hle rin a ni.