Swine Flu vangin State sorkarte fimkhur turin chah

January thla chanve chhung leka swine flu natna avanga boral mi 49 zet an awm hman avangin Union Health Ministry chuan state tin sorkarte chu fimkhur turin a chah. Rajasthan bikah he natna avanga boral ta hi 31 zet an awm tawh a, he natna tuar na ber an ni hrih a ni.

Union Ministry thuchhuah chuan, "State sorkar zawng zawngte he natna inthehdarh dan, inkaihchhawn leh endik a nih theih dante zirtirna kalpui tura hriat-tir an ni tawh. Hei mai bakah hian he natna enkawlna tura pawimawh damdawi-in khum leh damdawi mamawh nei vek tura hriattir an ni tawh bawk," tiin swine flu chungchanga mipuite zirtirna pek a pawimawh thu an chhuah.

Union Health and Family Welfare Ministry tarlan danin nikum chhung khan swine flu natna vei 14,992 awmin mi 1,103-in an thih phah a ni. Kum 2017 khan swine flu vei 38,811 awmin mi 2,270-in an thih phah bawk. 

Fortis Hospital-a thawk Dr. D.S. Chaddha chuan naupang kum 5 hnuailam leh kum 65 chin chunglam tan he natna hi kai a awlsam bik tih a sawi a, anni bakah hian thawhah nei, zunthlum, leh puitlng thau lutuk leh nu nau pai mekte tan he natna hi kai a awlsam tih a sawi tel bawk.