ISIS kaihhnawihah mi pakua man an ni

Republic Day lawmna tur atan inpuahchahna nasa taka kalpui zel a ni a, Maharashtra Anti Terror Squad chuan firfiak pawl hlauhawm tak ISIS nena inkungkaihna neia puh mi pakua an man a, an hming erawh tarlan a ni lo.

Heng mi pakuate hi kar hnih chhung chu Maharashtra Police-te hian ngawrh takin an enthla a, Republic Day lawmnaah pawi an khawih ngei dawn nia a lan hnuah heng mite man an ni ta a ni. 

Maharashtra Police-te hian an mi mante hi an hming tarlang lo mahse an manna hmun leh an kumte an tarlang thung. Heng an mante hi Maharashtra chhunga Auranagabad, Mumbra leh Thane aṭanga man an ni a, man zingah hian kum 17 mi pawh a tel nghe nghe. An zavai hian pawikhawihna thlen tum leh dan pawna chet tum thubuai siamsak vek an ni.

Kum 2017 khan ISIS firfiak pawl hruaitu Abu Zaid chu Mumbai Airport-ah man a lo ni tawh a. India rama pawi a khawih hmain man hman a ni thung. Maharashtra Police-te chuan venna khauh taka kalpui zel an tum thu an sawi a, Intelligence Agency nen ngawrh taka firfiak pawl nena inkungkaihna neite zawn hna an thawh mek thu an tarlang a ni.