Farm law sut turin October thleng sorkar hun pe
Sorkar laipuiin farm law thar pathum a siam duh lohna lantira nikum November thla aṭanga Delhi border-a nawrh huaihawt, loneitu pawl hrang hrang zinga Bharatiya Kisan Union (BKU) chuan nawrh an titawp mai dawn lo tih sawiin, heng dan siam tharte sut turin sorkar laipui chu October thleng hun a pe tih an sawi.
BKU hruaitu Rakesh Tikait chuan nawrh huaihawtna aṭanga chuan an kal darh mai dawn lo tih sawiin, lungawi lohna lantir nasa zawka kalpui an tum thu leh, Delhi khawpuiah chauh ni lo, India ram pumah rally lian tham tak, 'tractor kantri' neih an tum tih a sawi a ni.
"Sorkar laipui chu a farm law siamte sut tur leh MSP siam ngei turin October thla thleng hun kan pe a ni. Kan thil phutte hi a hlawhtlin loh chuan October 2 aṭangin nasa zawkin lungawi lohna lantir chhunzawm a ni ang," a ti.
Inremna siam dan tur ngaihtuaha sorkar laipuiin inbiakna neih leh a rawt chungchangah, Tikait chuan thu delhkilh awma inbiakna neih an duh lo tih a sawi bawk.
Kum 2020, September thlaa sorkar laipuiin farm law thar pathum a siam duh lohna lantirin, ram chhung hmun hrang hranga loneitute chuan nikum November 26 aṭang khan Delhi border-ah lungawi lohna an lantir a ni. Nawrh huaihawtna tel tam ber hi Punjab, Haryana leh Uttar Pradesh aṭanga kalte an ni.
Delhi Police-ten Iqbal Singh an man
January 26-a loneituten lungawi lohna lantira Delhi khawpuia tractor rally an huaihawt ṭuma Red Fort-a buaina chhuak kaihhnawiha Delhi police-ten 'wanted'-a an puang, Iqbal chu Thawhlehni zan khan Punjab-a Hoshiarpur-ah man a ni.
Red Fort-a buaina chhuaka mawhphurtu zinga puh, Iqbal Singh man a nih theihna atana a awmna chin hrilh theih hnenah Delhi police-te chuan lawmman, Rs 50,000 pek an lo tiam tawh a ni. Thawhṭanni khan tharum thawhna thleng chungchanga loneitute fuihtu ber nia puh, actor-activist Deep Sidhu chu Delhi police special cell chuan an lo man tawh bawk. Sidhu awmna chin hrilh thei tan police-te hian lawmman, Rs nuai khat an lo tiam bawk a ni.
Loneituten January 26-a tractor rally an neih ṭum hian Delhi police-te nen innawr buaiin, nawrh huaihawt zinga tam tak chuan an tractor nen Red Fort lut luiin, Independence Day-a India hnam puanzar pawhpharna atana an hmanahte chuan sakhaw bil puanzarte an zar a, hei hian sawizui a hlawh hle.