Rajya Sabha-ah Major Ports Authority Bill, 2020 pawm a ni Rajya Sabha chuan nimin khan Major Port Authorities Bill, 2020 a pawm

He bill hi Division Voting atan nimin khan chhawp chhuah a ni a, member 84-in a thlawp lamah an vote laiin member 44 chuan thlawp lo lamah an vote thung.

Major Port Authorities Bill, 2020 hi port liantea ruahmanna siamna, inkaihhruaina dan leh kalpui dan tur chungchang a nih bakah he bill hnuaiah hian India rama port lian zualte chuan anmahniin thuneihna lian zawk an nei dawn. Major Port Trusts Act, 1963 thlakna tur a ni a, nikum September 23 khan Lok Sabha lamah chuan pawm a lo ni tawh bawk.

Ports, Shipping and Waterways Minister Mansukh Mandaviya chuan bill pawm thar chu port liante privatisation-na tur ani lo tih sawiin mimal port-te nena an inelna kawnga port liante'n awlsam zawka anmahnia thutlukna an siam theih zawkna tur a nih thu a sawi.

India ramah hian tunah hian major port 12 a awm a, chungte chu- Deendayal (Kandla tia hriat ṭhin), Mumbai, JNPT, Marmugao, New Mangalore, Cochin, Chennai, Kamarajar (Ennore tia hriat ṭhin), V O Chidambarnar, Visakhapatnam, Paradip leh Kolkata (Haldia telin) te a ni. Heng port-ahte kum 2019-20 khan cargo ton maktaduai 705 thawn chhuah leh lakluh a ni.