CAA Rules buatsaih mek a ni : Home Ministry

Ministry of Home Affairs chuan Citizenship Amendment Act (cAA), 2019 hnuaia Rules-te chu buatsaih mek a nih thu sawiin, he Act hi October 1,2020 aṭanga hman ṭan a nih thu nimina Rajya Sabha inkhawmah a sawi. 

Congress MP Digvijaya Singh-a'n CAA hnuaia rules-te siam a ni tawh em tih zawhna a chhannaah, buatsaih mek a nih thu leh; committee on Subordinate Legislation, Lok Sabha leh Rajya Sabha chuan April 9 leh July 9 thleng rules siamna tur hian hun a pek belh thu minister of state for home affairs Nityanand Rai chuan a sawi a ni. 

CAA hi kum 2019, December thla khan pass a ni. He dan hnuaiah hian Afghanistan, Bangladesh, leh Pakistan rama Hindu, Sikh, Buddhist, Jain, Parsi, leh Kristian regufee, kum 2015 hma lama India rama rawn lutte chu India khua leh tui nihna pek theih an ni a, Muslim sakhaw zuitute erawh a huam ve lo thung. 

He dan siam hi a bikin hmarchhak bialah leh Delhi khawpuiah duh lohna nasa taka lantir a ni a, CAA duh lohna lantirnaa buaina chhuakah mi 53 chuang an thi tawh a ni.