Ballot paper era ah kan let tawh dawn lo : CEC

Political party leh hruaitu tam takin Lok Sabha inthlanpui neih turah vote thlakna atan ballot paper hman leh an duh thu sawi mah se, Chief Election Commissioner of India (CEC) Sunil Arora chuan ballot paper hman a ni tawh dawn lo tih a sawi. 

CEC Arora chuan, "Vote thlakna atan hian EVM leh VVPAT-te kan hman chhunzawm zel dawn. Political party leh midangte lak aṭangin sawiselna leh rawtna hrang hrang awmte dawngsawng turin kan inhawng reng a, hemi rual electronic voting machine hman titawp a, ballot paper era-ah let tumna erawh kan nei lo", a ti. 

Tunhnaiah US-a Indian cyber expert chuan kum 2014 Lok Sabha inthlanpuiah khan EVM kaltlangin vote tichingpen a ni tih a sawi a, EVM khawlte chu khawih danglam theih niin a lo sawi sawi a ni. Cyber expert Syed Shuja hian Lok Sabha inthlanpui bakah state eng emaw zata assembly inthlanah EVM-te khawih danglam a ni tih a sawi a, mahse Election Commission of India chuan he puhna hi thu dik lo nia sawiin, EVM-te chu khawih danglam theih a ni lo tih a sawi.

EC chuan EVM-te khawih chingpen nia a sawi chungchangah Syed Shuja chhui chiang tur hian Delhi Police-ah ngenna a thlen a, Delhi Police-te hian FIR an ziaklut a ni. 

Bahujan Samaj Party (BSP) hotu Mayawati chuan Lok Sabha inthlan lo awm turah hian EVM aiah ballot paper hman a phut thu a sawi leh a, cyber expert thusawi aṭang hian EVM rinhlelhna a tizual niin a sawi. Samajwadi Party pawhin EVM rintlak tawk leh tawk loh chungchangah zawhna a awm tih a sawi. Congress chuan Shuja thusawi chungchang hi sawifiah turin EC a ngen bawk. Hetihlai hian BJP leh JD(U) chuan EVM hman chhunzawm zel hi an thlawp thu an sawi thung.