Railways-in hna thar la hnem dawn

Indian railways chuan kum hnih lo awm tur chhung hian hna thar nuai hnih chuang zet a la dawn a, kum 2017-a an lo tihchhuah tawh hnaruak nuai khat leh singnga zet hnawhkhah lohin a la awm bawk. 

Railway ministry tarlan danin thawktu  15,06,598 lai an nei thei a, heng zingah 12,23,622 chu hnawhkhah niin  2,82,976 zet chu hnawhkhah lohin a awm reng a ni. Railway ministry chuan thawktu thar lak a nih chuan hmasawnna chak zawka an kalpui theih tur thu an sawi a ni.

Sorkar dan dinglai angin Schedule Caste tan hnaruak 19, 715 chu dahhran a ni dawn a, Schedule Tribe leh Other Backward Classes tan 9,857 leh 35,485 ve ve dahhran a ni bawk ang. Narendra Modi sorkar hnuaia dan siam thara mirethei leh sum leh paia harsa bik chhungkaw tan 10% dahhran a ni dawn bawk. 10% hi a tlem lo hle a, an hna lak thar tur zinga 13,100 vel zet a ni.

Hna lak thawhkhatna hi February-March, 2019 aṭanga ṭan tur a ni a, he hun chhung hian thawktu 1,31,428 lak an ni dawn. Hna lak thawh hnihna hi May-June, 2020 aṭanga ṭan tur niin, hemi hun chhung  hian thawktu 99,000 lak an ni ang.