Fa pahnih aia tam nei tan vote phal loh nise: Baba Ramdev

Yoga Guru Baba Ramdev chuan India rama mipui tam lutuk khuahkhirhna atana ṭha ber chu fa pahnih aia tamte tana vote thlak theihna chanvo hlihsak a nih thu a sawi. 

Aligarh, Uttar Pradesh-a thu a sawinaah Ramdev hian, "Kan rama mipui tam lutuk khuahkhirhna atana ṭha ber chu nupa, fa pahnih aia tam neite vote thlak theihna hlihsak mai bakah an hna leh sorkar damdawiina inenkawlna tihtawp bawk nise a ṭha ber ang. Muslim emaw Hindu emaw pawh nise he dan hi hman a nih chauhin kan rama mipui tam lutuk hi kan khuahkhirh thei ang," tiin fa neih tlem chu India tana kawng awmchhun a nih thu a sawi.

Ramhmul damdawi aṭanga siam Patanjali dintu zinga mi Ramdev hian nikum pawh khan mipui lawm loh tak thu a lo sawi zauh tawh bawk a. Damchhunga nupui nei lote chu a bik taka chawimawi an phu thu a lo sawi tawh a ni. Ramdev hi India rama hausa ber 48-na a tling phak a, a thil neih zawng zawng hlut zawng hi Rs. 16,000 crore a tling phak a ni.